చిన్న వ్యాపారులకు ఫ్లిప్‌కార్ట్ చేయూత... ఇకపై జీరో కమిషన్

ప్రముఖ ఈ-కామర్స్ దిగ్గజం ఫ్లిప్‌కార్ట్, తమ ప్లాట్‌ఫామ్‌లోని విక్రయదారులకు భారీ ఊరట కల్పిస్తూ కీలక నిర్ణయం తీసుకుంది. రూ.1,000 కంటే తక్కువ ధర కలిగిన అన్ని ఉత్పత్తులపై 'జీరో కమిషన్' విధానాన్ని అమలు చేస్తున్నట్లు ప్రకటించింది. ఈ కొత్త విధానం ఫ్లిప్‌కార్ట్‌తో పాటు దాని అనుబంధ సంస్థ అయిన షాప్సీకి కూడా వర్తిస్తుందని స్పష్టం చేసింది.

ఈ కొత్త నిబంధనల ప్రకారం, షాప్సీ ప్లాట్‌ఫామ్‌లో విక్రయించే ఏ ఉత్పత్తిపైనా ఎటువంటి కమిషన్ ఉండదు. ఈ మార్పుల వల్ల వ్యాపార నిర్వహణ ఖర్చులు సుమారు 30 శాతం వరకు తగ్గుతాయని ఫ్లిప్‌కార్ట్ అంచనా వేస్తోంది. తద్వారా వినియోగదారులకు మరింత సరసమైన ధరలకే ఉత్పత్తులను అందించడం సాధ్యమవుతుందని కంపెనీ భావిస్తోంది.

దేశీయ సూక్ష్మ, చిన్న, మధ్య తరహా పరిశ్రమలను (ఎంఎస్ఎంఈ) ప్రోత్సహించే లక్ష్యంతోనే ఈ నిర్ణయం తీసుకున్నట్లు ఫ్లిప్‌కార్ట్ తెలిపింది. ప్రస్తుతం దేశ జీడీపీలో ఈ రంగం వాటా దాదాపు 30 శాతంగా ఉందని కంపెనీ గుర్తుచేసింది. 

"ఈ కొత్త విధానం స్థానికంగా అభివృద్ధి చెందుతున్న బ్రాండ్లు డిజిటల్ ఆర్థిక వ్యవస్థలోకి మరింత ఆత్మవిశ్వాసంతో అడుగుపెట్టేందుకు దోహదపడుతుంది. వినియోగదారులకు కూడా తక్కువ ధరలకే ఉత్పత్తులు అందుబాటులోకి వస్తాయి" అని ఫ్లిప్‌కార్ట్ సీనియర్ వైస్ ప్రెసిడెంట్ సాకేత్ చౌదరి వివరించారు. ఈ నిర్ణయంతో చిన్న వ్యాపారులపై ఆర్థిక భారం తగ్గనుంది.